** *Ny fahasoavan’Andriamanitra : Jesosy Kristy no fahazavana tonga ho an’izao tontolo izao, araka ny voalaza ao amin’ny (Jaona 1:9). Izy no mitondra ny famonjena sy ny fiainana mandrakizay ho an’izay mino Azy. Ny Antso hoe « Mitsangana, Mihazava » dia tsy baiko ho an’ny olona mba hanao zavatra hahazoana famonjena, fa antso kosa mba handray ny fahazavan’i Kristy izay efa tonga, fiantsoana mba haneho izany amin’izao tontolo izao hoamin’ny asa, Manasongadina ny maha zava-dehibe ny fiainana kristiana izay maneho ny finoana amin’ny alalan’ny asa tsara.
** *Ny voninahitr’Andriamanitra no ivon’ny zava-drehetra : Ny fahazavana izay tonga dia fanehoana ny voninahiny. Ny fiangonana amin’ny maha-vatan’i Kristy azy sy fahazavan’izao tontolo izao azy dia miantso ny olona rehetra mba handray io fahazavana io. Ny Kristiana tsirairay dia tokony ho taratry ny fahazavan’i Kristy amin’ny alalan’ny teny sy ny asa.
** *Ny famonjena dia avy amin’ny fahasoavan’Andriamanitra irery ihany : amin’ny alalan’ny finoana an’i Jesosy Kristy. Tsy misy zavatra azontsika atao hahazoana izany, ny Kristiana dia antsoina hiaina fiainam-baovao ao amin’i Kristy, fiainana feno fitiavana, fifaliana ary fiadanana, tokony hanana fanantenana ny fiainana mandrakizay miaraka amin’Andriamanitra any an-danitra.
Ny andininy sasany ao amin’ny Testamenta Taloha sy Vaovao izay manohana ny teolojian’ny Isaia 60:1.
** *Salamo 27:1″ Jehovah no fahazavako sy famonjena ahy; iza no hatahorako? Jehovah no fiarovana mafy ho an’ny aiko; iza no hangovitako? ». Ity andininy ity dia manasongadina an’i Jehovah ho loharanon’ny fahazavana sy ny famonjena, izay mifanaraka amin’ny hevitra hoe i Kristy no fahazavana tonga.
** *Salamo 119:105 » Fanilon’ny tongotro Sy fanazavana ny lalako ny teninao. » Ity andininy ity dia manasongadina ny tenin’Andriamanitra ho toy ny fahazavana izay mitarika antsika, izay azo ampiharina amin’ny fomba itarihan’i Kristy antsika amin’ny alalan’ny filazantsara.
** *Jaona 1:9 « Tao ny tena Mazava* Izay mahazava ny olona rehetra tonga amin’izao tontolo izao**. [*Na: Izy no tena Mazava] [**Na: Ny Mazava marina, Izay mahazava ny olona rehetra, dia tonga amin’izao tontolo izao] ». Ity andininy ity dia manambara mazava fa i Jesosy no tena fahazavana, izay mifanaraka mivantana amin’ny hevitry ny Isaia 60:1.
** *Jaona 8:12″ Ary Jesosy niteny tamin’ny olona indray ka nanao hoe: Izaho no fahazavan’izao tontolo izao; izay manaraka Ahy tsy mba handeha amin’ny maizina, fa hanana ny fahazavan’aina. »Ity andininy ity dia manamafy fa i Jesosy Kristy no fahazavana voalaza ao amin’ny Isaia 60:1. Izy no mitondra ny fahazavan’ny fiainana ho an’ireo izay mino Azy.’
** *Matio 5:14-16 « Ianareo no fahazavan’izao tontolo izao. Tsy azo afenina izay tanàna miorina eo an-tampon-tendrombohitra. Ary koa, tsy misy olona mandrehitra jiro ka mametraka azy ao ambanin’ny vata famarana, fa apetrany eo amin’ny fanaovan-jiro, ka dia mazava amin’izay rehetra ao an-trano izany. Aoka hazava eo imason’ny olona toy izany koa ny fahazavanareo, mba hahitany ny asa soa ataonareo ka hankalazany ny Rainareo Izay any an-danitra. »Ity andininy ity dia mampianatra fa ny mino dia antsoina mba ho fahazavana ho an’izao tontolo izao, amin’ny alalan’ny fiainany sy ny asany. Izy io dia manamafy ny hevitra fa ny fahazavan’i Kristy dia tokony hamirapiratra amin’ny alalantsika.
** *1 Jaona 1:5″ Ary izao no teny renay taminy ka ambaranay aminareo: Andriamanitra dia mazava, ary tsy misy maizina akory ao aminy. »Ity andininy ity dia manamafy ny toetran’Andriamanitra ho toy ny fahazavana, izay i Kristy no fanehoana tonga lafatra.
Lesona tsoahina avy aminy teolojian’ny Isaia 60:1.
** *I Kristy no Fahazavana: Ny lesona fototra dia i Jesosy Kristy no tena loharanon’ny fahazavana ara-panahy. Izy no mitondra ny fahamarinana, ny fanantenana ary ny famonjena ho amin’ny tontolo maizina.
** *Antso ho amin’ny fandraisana: Ny antso hoe « mitsangana, mihazava » dia antso ho antsika mba handray an’io fahazavana io amin’ny alalan’ny finoana. Tsy tokony hanafina an’io fahazavana io isika, fa aoka izy hamirapiratra ao amin’ny fiainantsika.
** *Andraikitra ho amin’ny fizarana: Amin’ny maha-Kristiana antsika, dia manana andraikitra hizara io fahazavana io amin’ny hafa isika. Amin’ny alalan’ny teny sy ny asa, dia tokony hitaratra ny fitiavana sy ny fahasoavan’i Kristy isika.
** *Fanantenana eo anivon’ny haizina: Na eo aza ny fanamby sy ny haizina atrehintsika, dia manana fanantenana isika ao amin’i Kristy. Izy no fahazavana izay mandresy ny haizina rehetra.
Hoan’Andriamanitra Ray sy Zanaka Ary Ny Fanahy Masina Anie ny Voninahitra, Amena.
